තරග පාවා දුන් තුන්කට්ටුව - 23

කපිල් ගෙන් ලක්ෂ 25 ක් !

.........................................................

ඉන්දියාවට මුල්ම ලෝක කුසලානය ගෙන ආ කපිල් දේව්, තමන්ට මුදල් දී තරගයක අඩු දස්කම් දක්වන්නට ආරාධනාවක් ගෙන ආ ප්‍රභාකර් මුල්ම වරට පවසන්නේ හැන්සි ක්‍රොන්යේ සිදුවීමටත් පෙරයි . 

පහත දැක්වෙන්නේ ප්‍රභාකර් විසින් ටෙහෙල්කා සඟරාවේ වෙබ් අඩවියට ලබාදුන් සම්මුඛ සාකච්ඡාවේ පරිවර්තනයයි.

ටෙහෙල්කා:සිංගර් කුසලානයේ පකිස්තාන තරගයට එරෙහිව ලක්ෂ 25ක් ලබාදී අඩු දස්කම් දක්වන ලෙස පැවසුවේ කවුද ?

ප්‍රභාකර්: මේ නම සාමන්‍යය නමක් නොවෙයි. ඒ තමයි කපිල් දේව්.

ටෙහෙල්කා: ඔබ කියන දේ සම්පූර්ණ සත්‍යයක් ද ?

ප්‍රභාකර්: ඔව්, ඇත්ත වශයෙන්ම.

ටෙහෙල්කා: ඔබ ලැහැස්තිද Lie Detector පරීක්ෂනයකට ?

ප්‍රභාකර්: ඔව්, ඕනෑම වෙලාවක ලැහැස්තියි.

ටෙහෙල්කා: ඔබ, ඔහුගේ නම මේ සඳහා සම්බන්ධ කරන්න බය නැද්ද ?

ප්‍රභාකර්: බොරු කියනවා නම් පමණයි බිය විය යුත්තේ. ඇඬිය යුත්තේ වරදක් කළොත් පමණයි. මම බොරු කියන්නෙත් නෑ, වරදක් කළෙත් නෑ.

ටෙහෙල්කා: ඇත්තටම මොකද්ද සිද්ධවුනේ ?

ප්‍රභාකර්: ඕස්ට්‍රේලියාව එක්ක පවත්වපු තරගයේ මං හොඳටම දස්කම් දැක්වූවා. ලකුණු 35ක් රැස්කළා වගේම කඩුලු 3ක් හෝ 4ක්, දුවද්දී දැවී යාම් දෙකක්. එදා හවස් වරුවේ ඔවුන්ට මාව අවශ්‍යය වුනේ. මොකද, තරගයක් පරද්දන්න දස්කම් දක්වන ක්‍රීඩකයා වැඩේට අල්ලගත්තොත් පහසු නිසා. 1994 අවුරුද්දේ මං තරම් දස්කම් දක්වපු කෙනෙක් හිටියේ නෑ.

ටෙහෙල්කා: තරගය වර්ෂාව නිසා අවලංගු වුනා නේ ද ?

ප්‍රභාකර්: ඔව්, හැබැයි තරගය දිගටම පැවැත්වූවා නම්, තරගය පාවා දුන්නාද නැද්ද කියලා ඔප්පු කරන්න පහසු වෙන්න තිබ්බා.

ටෙහෙල්කා: කණ්ඩායමේ නායකයා සහ කළමණාකරු හමුවෙන්න ගියේ නැද්ද ?

ප්‍රභාකර්: මං වඩේකාර් (අජිත් වඩේකාර්) හමුවෙන්න ගියා, ඔහු කිව්වා, ඒක අමතක කරන්න කියලා. ඊළඟ තරගය (අවසන් තරගය) ගැන විතරක් අවධානය යොමු කරන්න කියලා.

ටෙහෙල්කා: වඩේකාර් පුදුම වුනාද ඔබ කියපු දේ පිළිබඳව ?

ප්‍රභාකර්: මම පුදුම වුනා, ඔහු එයට පුදුම නොවීම පිළිබඳව. ඊළඟට සිද්ධ වුනේ මොනවද ? ඒ අය ඒ පිළිබඳව කටයුතු කළේ කොහොමද කියන එක ගැන මම දන්නේ නෑ. හැබැයි, ඒ අයව හමුවූ විත්තිය ඔවුන් ප්‍රතික්ෂේප කළා.

ටෙහෙල්කා: අසාර් මොකද්ද කිව්වේ ?

ප්‍රභාකර්: මේ පිළිබඳව වඩේකාර් ට විස්තර කළාද කියලා ඇහුවා. මං පිළිතුරු දුන්නා, ඔව්, කියලා.

ටෙහෙල්කා: වෙන කාටහරි මේ පිළිබඳව විස්තර කළා ද ?

ප්‍රභාකර්: ඊළඟ තරගයේ දී මම ක්‍රීඩා පිටියට එද්දි ඉන්දීය විස්තර විචාරකයින් දෙදෙනා වන සුනිල් ගවස්කාර් සහ රවී ශාස්ත්‍රී හමුවුනා. ඔවුන්ට මම මේ පිළිබඳව පැහැදිලි කළා. සනී කිව්වා, ඒක අමතක කරලා, තරගයට අවධානය යොමු කරන්න කියලා. මම දන්නේ නෑ ඔවුන්ට ඒ සිදුවීම මතකද කියලා. හැබැයි ඒක අමතක වෙන්න බෑ. 

ටෙහෙල්කා: කපිල් ගැන ඔබේ හිතේ කණගාටුවක් නැද්ද ? 

ප්‍රභාකර්: මම බලා සිටියා ඔහු වරද පිළිගනිවී කියා. නමුත් සියලු දේ වෙනස් වුනා. ඒක සිද්ධ වුනේ 1994 දී. මිනිස්සු අහනවා ඇයි මම නිශ්ශබ්දව සිටියේ කියලා. කවුරුත් මේ ගැන මගෙන් අහන්න පැමිණියේ නෑ. මං මොකටද යන්නේ.

ටෙහෙල්කා: චන්ද්‍රචුද් කොමිසම ඔබෙන් මේ පිළිබඳව ඇසුවේ නැද්ද ?

ප්‍රභාකර්: හැමෝම දන්නවා ක්‍රිකට් ආයතනයේ පරීක්ශනය බොරුවක් කියලා. මං කිව්වා, පටිගත වෙච්ච තරග නැවත නරඹන්න කියලා. ඒ අය ඒක ගණන් ගත්තේ නෑ. 

ටෙහෙල්කා: කපිල් ට, දැන් කුමක්ද ඔබට කියන්න තියෙන්නේ ? 

ප්‍රභාකර්: මම කියන්නේ, ඔහු වරද පිළිගත යුතුයි. අතීතයේ සිදුවූ දෑ දැන් වෙනස් කළ නොහැකියි නමුත් අනාගතයේ සිදුවන දෑ පිළිබඳව ලැහැස්ති විය හැකියි. 

ටෙහෙල්කා: සිදුවීම ආවර්ජනය කළොත් ?

ප්‍රභාකර්: මම රැවුල කපමින් සිටියා. මගේ කාමර සඟයා නව්ජෝත් සිධු පැවසුවා, කපිල් ඇවිල්ලා ඉන්නවා, යම් දෙයක් ලබාදෙන්න කියලා. මම හිතුවේ, මගේ පිත්ත ට ස්ටිකර් (endorsement money) එකක් ලබාදෙන්නට වත් දෝ කියලා. මම දැනගෙන හිටියේ නෑ, ඒ ඉල්ලීම පකිස්තාන තරගය පරාජය වන ලෙස ක්‍රීඩා කරන්න කියලා. දැනගත් විගසම, මම ඔහුට බැන වැදුනා. 

ටෙහෙල්කා: මොකද්ද ඔබ කිව්වේ ?

ප්‍රභාකර්: මං කිව්වේ, මම ඉන්දියාව පරද්දන්න තරම් ද්‍රෝහියෙක් නෙමෙයි, මට මේ වැඩේට සමබන්ධ වෙන්න බෑ කියලා. ඔහු කාමරෙන් ඉවතට ගියා.

ටෙහෙල්කා: මේ පිළිබඳව තවත් කවුද දන්නේ ?

ප්‍රභාකර්: මගේ කාමර සඟයා නව්ජෝත් සිධු, එහා කාමරයේ සිටි නයාන් මොංගියා සහ ප්‍රශාන්ත් වෛද්‍යා.